Pierot Planquielle, natif de Tournay, commencha son apresure le XIIIe jour d’aoust l’an mil CCCC. LXIX avec Philippe Voisin, paintre. Lequel Pierot se partit de sondit maistre le Xe jour de mars l’an mû CCCC. LXXÏÏ [1473 n.s.] sans parfaire son apresure. et ala ledit Pierot parfaire son apresure à Valenchiennes sans estre aprentis de Tournay.

A Phelippe Voisin, paintre, pour avoir estoffé de painture et doré le table, gadran et toutes les parties d’œvres de ploncq, en la fourme et manière cy ensuivant déclarée, est assavoir : le fons de ladite table et gadran (du Beffroi), de fin asur à olle ; — item, le soleil d’icelui, le fleur de lis qui enseigne les heures, le verghe qui maine icelle fleur de lis, aussi le rose qui est au moillon du ront dudit gadran, dorés de fin or ; — item, ledit ront d’icelui gadran, estofié de fin blancq de ploncq; — item, les lettres dudit gadran, de noir à olle; — item, tout le surplus de ladite table, couché de fin vermeillon et glachié de fin chynopre; —item, les iiij casteaux qui sont aux quatre cornes de ladite table, argenté de fin argent; — item, l’escu de France qui est au milieu de ladite chamarande, estoffé de fin asur, comme dessus, et les fleurs de lis et couronne d’icelui, doré de fin or; — item, les deux piliers qui sont aux deux costés dudit gadran, point est assavoir ; le fons d’iceulx, tout de blancq de ploncq tel que dit est, et toutes lesdites fœilles de ploncq, fiolles et arcques desdits piliers, doré de fin or, et pareillement les deux pinacles d’iceulx; — item, les cieux desdits piliers, estofféz de pluiseurs couleurs; — item encores, doré de fin or tous les bonchiaux servans à icelle chamarande, et les fœilles et arcques qui s’espardent en desoubz icelle sur ladite table, et semblablement doré les six grandes fœilles qui sont sur ladite chamarande, et les quatre grandes fœilles qui sont à le verghe qui porte la dessusdite grande fleur de lis, et pareillement ladite fleur de lis; a esté payé 98 lb. 16 s. 5 d.

A Philippe Voisin, paintre, pour avoir estoffé de pointure la devanture de ladite maison et eschoppe séant à l’encontre du Belfroit, ainsi qu’il s’ensuit, est assavoir : toutes les lieuses et fœilles faisans crestes à ladite wimberghe, doré de fin or; — item, le dessusdit Saint Salvateur, pareillement doré de fin or;— — item, tout le fons de ladite wimberghe, estoffé de fin asur et de fleurs de lis d’or ; — item, le noche rencosé de ladite devanture, paint le fons de vermeillon et semé des armes du Roy, nostre sire, de monseigneur le Dolphin, de la Royne et de la ville; — item, les dix ymaiges desur les pochars du premier estage, point d’asur, d’or et de pluiseurs tires de couleurs à olle; — et tout le surplus de ladite devanture, de fin vert à olle; — et livré une banière de samy vermeil à tout fringes de soye, pour le trompette de ladite ville, laquelle est estoffée à deux léz des armes de la ville, 56 s.

A maistre Phelippe Voisin, paintre, pour avoir, selon le marchet par lui fait à messeigneurs les chiefz, paint le sallette de l'eschoppe de la ville de fin vermeillon à destrempe, et sur ledit vermeillon semé les armes de ladite ville; — item, point et estoffé de pluiseurs couleurs à olle, selon que l’œvre le désiroit, les cincq ymaiges estans sur les piliers des lambrouchaiges d’icelle sallette, avecq ung tabliel qui revest le cheminée tout autour, où est le couronnement du Roy, nostre sire, accompaignié des douse Pers de France ; — et sur les costés dudit tabliel, fait France et Tournai, 16 lb. 10 s. 2 d.

A maistre Philippe Voisin, pour avoir paint et estoffé la croix estant en le place des bourgois, au lieu de Loquignœl, de fin vert à olle, et le crucefix qui est à l’un des léz de ladite croix estoffé de carnières à olle, et le tabernacle de dessus ledit crucefix de blancq à olle; — item, l’ymaige de Nostre-Dame, estant de l’autre costé de ladite croix, estoffé, le mantel de blancq à olle, le collette de vermeillon glachié de sinopre, le tabernacle de dessur de ploncq, et tout ledit ouvrage vernit bien et souffîssament ; — et pareillement paint et estoffé le heuse estant sur la tour des Six, de blanc et de noir à olle et de pluiseurs aultres coulleurs aussi à olle, 70 s.

A maistre Philippe Voisin, pour avoir paint et estoffé cincq nouviaux tabletz, les fons de fin or, et sur iceulx fons les ramebrances de Jésus-Crist, de la Vierge Marie et de monseigneur S. Jehan, le tout de coulleur à olle, lesquels tabliaux ont esté mis en la halle de ladite ville, pour servir et porter par ceulx qui sont condempnéz à mort, en allant à leur darrain supplice, quant mestier sera, 105 s.

A Philippe Voisin, pour avoir point ung escu de France couronné, et l’estoffé de bon or et asur, est assavoir : les trois fleurs de lis et le couronne, d’or, et le camp, d’asur, tout à olle, lequel escu est mis au bollvercq de le porte Coquerel; et avec ce, couvert deux autres semblables escus adfin de mieulx les garder de pourreture, 4 1b.

A Philippe Voisin, paintre, pour marchié à lui fait de estoffer trois ymaiges estans en la devanture de la halle des dits doyens, avec l’escu d’asur, les fleurs de lis, hachement et deux angles, avec les escus de Tournay, lesdites choses estoffées selon la devise sur ce faicte, 98 lb. ; — item, et aussy pour avoir, oultre sadite devise et marchié à lui fait, estoffé d’azur et d’or deux encorbelures qui sont assises sur les tabernacles du Roy, de la Reyne et l'imaige du petit Dieu, qui ne devoit estre que de sinopre, et faict ung drap de soye vermeil devens ledit hachement, seméz de couronnes d’or, pour lesquelles choses a esté ordonné de grâce, 7 lb. t. ; — et pareillement à Philippe Truffin, Haquinet le Baccre et aultres juréz du mestier stil des paintres, pour avoir visité tout ledit ouvraige et en avoir fait le rapport, leur a esté ordonné pour leur sallaire quarante solz tournois.

A Philippe Voisin, pour avoir point et estoffé deux affutz de deux serpentines estans aux Engiens, et y figuré deux serpens et aultres marmousés tout furny de diverses coulleurs à olle, et pareillement point et estoffé ung escu de France et ung escu de Tournay aux deux posteaulx du pont levich nouveau fait à la porte Vallenchiennoise, en quoy ledit Philippe a employé bon or, asur, blanc de ploncq et autres coulleurs nécessaires, 20 s.

A Philippe Voisin, pointre, pour avoir point et estoffé le festissure du Puys-l’Auwe, de six piéz de long, de blancq de ploncq à oille, de noir, de vermeillon, de verd et de machicot, avec les deux petites heuses estans sur ladite festissure, de couleurs pareilles, et sur lesdites heuses les armes du Roy et de la ville, avec les florons des banières de bon fin or et d’asur, et pareillement ung escu de monseigneur le Dolphin, 6 lb.

A Philippe Voisin, pour avoir point, doré et estoffé de bon or, asur et aultres coulleurs et estoffes à ce nécessaires, ung escut de France de bos, estant de piécha aux Engiens, lequel a esté mis et atachié au mur de la poyée (balcon) ‘de la porte Marvis, pour l’emparement et décoration de ladite œvre, et sur ledit escut escript la datte d’icelle, 4 lb. 18 s.